الرئيسية / مقالات / كيفك من جوا ؟

كيفك من جوا ؟

خلينا نحاول ندخل لذاتنا أكثر وأكثر و نسأل حالنا : كيفني أنا من جوا ؟؟

أنا شخص قوي… مبسوط… ما بهمني شي… ودايماً لما يسألوني كيف حالك؟ بجاوب بسرعة وبدون ما أفكر ومرات بجامل… بجاوب إنّي منيح…

بس عمرو حدا سألك، كيف حالك من جوا؟!  من برا إنت منيح أو عم بتحاول تبين منيح…

بس كيفك من جوا؟!…

هالمرة مش محتاج تجامل حدا… محتاج تصارح حالك وتفكر منيح… إنت أكتر شخص بيعرف حالك…

تجرَّد من كل شي خارجي وحاول فوت لأعماق نفسك من جوا…

كيف حالك من جوا؟!  تعبان! ومش قادر تبين؟… ما عم تقدر تحكي لحدا همومك ومشاكلك؟… ما عم تلاقي الشخص يلي بيقدر يفهمك!…إنت مرات ما بتفهم حالك؟!

كيف حالك من جوا؟… بتحس حالك مرات ضايع ومش فاهم ليه عم يصير معك هيك بحياتك؟… بتسأل أسئلة كتير ومش لاقي عليها جواب؟… بتعاتب ربنا ع يلي بيصير معك؟…

كيف حالك من جوا؟… مش متقبِّل حالك أو شكلك؟… عم بتكون وحيد وانطوائي… بتحس الحواليك ما عم

يتقبلوك بالعكس عم يجرحوك ويسببولك أذى؟…

كيف حالك من جوا؟… بتحس مشاكل عيلتك أو مجتمعك عم تأثر عليك؟.. وعم بتحاول تكون منيح وتكمل ب هالطريق بس عم بتسكر بوجهك البواب؟…

كيف حالك من جوا!… إنت من جوا شخص منيح بس عم تستحي تبين هالشي وعم تتعامل مع يلي حواليك بالعكس حتى تحافظ ع مكانتك اولحتى ما حدا يضحك عليك؟…

كيف حالك من جوا؟… مغرور ب حالك وبقوتك وعم تتكبر على النعمة يلي الله أعطاك ياها ومش مقدّرها… وعم تطلب أكتر وأكتر وعم تطلب إنو تحصل على يلي بدك ياه؟…

كيف حالك من جوا؟… دافن وزناتك يلي الله أعطاك ياها وعم تستقل ب حالك وبتستضعف حالك وبتقتنع إنك ما بتقدر تكون أو تعمل فرق؟…

كيف حالك من جوا!… عايش بالخطية وحاسس إنها مقيديتك ومش قادر تخلص من هالقيد؟ لأنك خايف أو مستحي؟… عم تتألم وتتوجع بصمت وبدون ما تبين لحدا؟…

كيف حالك من جوا!… حاسس يلي حواليك فاهمينك غلط؟!! وصلت ل حد إنك تعبت!… تعبت كتير وبدك ترتاح!!

كيف حالك من جوا!…حزين!… مهموم… ضايع؟… حيران!.. مهزوز… ضعيف؟.. خاطي… مغرور!! يائس؟! خايف!…

(صمت)

اسمع صوتو… دايماً بيناديك وبيستناك…روح لعندو… أعطي حالك فرصة تكون منيح من جوا…  اوثق فيه… ورح يحوِّل خوفك إيمان وثقة… حيرتك يقين…حزنك فرح… همك راحة…يأسك رجاء وضعفك قوة…

 

عن ميس داود

خريجة جامعة الاميرة سمية للتكنولوجيا/ تخصص هندسة إلكترونيات. عضو في شبيبة قلب مريم الطاهر/ الفحيص منذ 2000 مسؤولة فئة الاعدادي في شبيبة قلب مريم الطاهر/ الفحيص منذ 2010 ولغاية 2015 عضو في لجنة الاعدادي للأعوام 2015-2016-2017 في الأمانة العامة للشبيبة المسيحية / الأردن.

شاهد أيضاً

صراعٌ مع الذات

تجولُ بداخلي أنا الإنسان، عاصفةٌ من الأفكارِ التي تُشبِعُ رغبتيّ كإنسانٍ وتُنعـشُني، لكنّها تؤلمني لأنّها …

اترك تعليقاً

لن يتم نشر عنوان بريدك الإلكتروني.